"Россия ва Хитой билан урушга йўл қўймаслик асосий мақсадимиз бўлиши керак” — АҚШ генерали Жон Хайтен
АҚШ қуролли кучлари штаб бошлиқлари бирлашган қўмитаси бошлиғи ўринбосари генерал Жон Хайтен Брукингс институтида Россия ва Хитойнинг Вашингтон билан уруши бутун дунёни вайрон қилиши мумкин, деган фикрни билдирган.
Хайтен АҚШ ўтмишда кўплаб қайноқ нуқталар, хусусан, Вьетнам урушида иштирок этганига қарамай, собиқ Иттифоқ билан тўғридан-тўғри тўқнашувга интилмаган.
" Россия ва Хитой билан урушга йўл қўймаслик бизнинг асосий мақсадимиз бўлиши керак. Чунки бу кун сайёрамиз учун даҳшатли кун бўлади. Бундай уруш бутун дунёни, дунё иқтисодиётини ҳалок қилади", — деган генерал.
Хайтен АҚШ ва Россия ўртасида стратегик барқарорликни таъминлаш бўйича музокараларда эришилган ютуқларга эътибор қаратган. "Бизнинг умумий фундаментал мақсадимиз бор – ҳеч қачон ўзаро уруш бошламаслик. Сабаби ядро қуроли билан уруш олиб бориш – жуда ёмон", — деб таъкидлаган амалдор. Шунингдек, генерал Хитой билан муаммоларни ҳал қилиш мақсадида мулоқотни бошлаш муҳимлигини қайд этган.
2021 йил июнь ойида АҚШ ва Россия етакчилари учрашувида стратегик барқарорлик масаласи муҳокама қилинган. Шундан кейин икки давлат ҳукумати аъзолари ушбу масалада учрашув ўтказган.
Бундан аввал АҚШнинг глобал урушдаги эҳтимоли паст баҳоланганлиги хабар қилинган эди.
Жаҳонгир Қўзиев
