Афғонистонлик футболчи қизлар Покистонга эвакуация қилинди

 

 

Покистон ахборот вазири Фавад Чаудрининг сўзларига кўра, Афғонистоннинг футбол бўйича аёллар жамоаси Исломободга етиб келган. “Афғон футболчи қизларини хуш кўрдик, улар “Торхам” чегара назорат пунктига келди”, – деган вазир.

 

Бир неча кун аввал “Толибон”нинг маданият масалалари бўйича комиссия аъзоси Аҳмадулло Восиқ аёлларнинг спорт билан шуғулланиши тақиқланганини маълум қилган.

 

Аёллар масаласи Афғонистон ички сиёсатида энг оғир масалалардан бири бўлиб турибди. Толиблар хотин-қизлар ҳуқуқини ҳимоя қилишга ваъда берса-да, амалда турли вилоятларда уларнинг фаолияти чекланмоқда. Афғонистоннинг бир қанча фаол аёллари мамлакатдан чиқиб кетган. Масалан,“Толибон” ҳокимиятга келгандан сўнг улардан илк интервью олган аёл бошловчи кейинчалик мамлакатни тарк этди. Мамлакатнинг турли вилоятларида “Толибон” сиёсатига қарши аёллар намойиши бўлиб ўтган.

 

Шундай бўлса-да, ҳаракат хотин-қизларнинг турли соҳалар, энг аввало, тиббиёт ва таълим соҳасида ишлашига рухсат берди. Шунингдек, 15 сентябрь куни Кобул халқаро аэропортига аёллар ишга чиқди. Ҳозирда улар 30 нафар, келгусида  60 га етиши кутиляпти.

 

Маълумот ўрнида: 15 август куни “Толибон” ҳаракати Кобулни эгаллаган.31 августда АҚШ Афғонистонни тўлиқ тарк этди. Ҳаракат томонидан эгалланмаган ягона вилоят Панжшер эди. Аммо 6 сентябрда ушбу ҳудуд ҳам “Толибон” назоратига ўтди.  Шундан кейин толиблар 7 сентябрь куни мамлакатнинг янги ҳукумати тузилганини эълон қилди.

 

 

Жаҳонгир Қўзиев