"Толибон” вакили: “Биз аёллар таълимига қарши эмасмиз, аммо...”
"Толибон" хотин-қизлар таълимига қарши эмаслигини маълум қилди. Бу ҳақда ҳаракат расмий вакили Забиҳулло Мужоҳид “Spiegel” нашрига берган интервьюсида айтиб ўтган.
Мужоҳид ҳаракат аёллар таълимига қарши эмаслигини таъкидлади. Аммо бунинг учун хавфсиз муҳитни яратиш лозим. Шунингдек, транспорт масаласини таъминлаш зарур. "Биз қизлар учун мактаб таълимига қарши эмасмиз, аммо ҳозирда мактабга қатнаш учун хавфсизлик механизмини ишлаб чиқяпмиз. Xавфсиз муҳит ва хавфсиз транспортни йўлга қўйиш керак. Собиқ ҳукумат аёлларни булар билан таъминламаган. Эътибор беринг, аёллар университетларда таълимни давом эттирмоқда. У ерда транспорт хавфсизроқ", – деган Мужоҳид.
Шунингдек, ҳаракат расмий вакили аёлларнинг таълим олиши ва меҳнат қилиши учун хавфсизлик механизмини ишлаб чиқадиган махсус қўмита тузилади.
Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат томонидан эгалланмаган ягона вилоят Панжшер вилояти эди. Аммо 6 сентябрьда ушбу ҳудуд ҳам “Толибон” назоратига ўтди. Шундан кейин 7 сентябрь куни мамлакатнинг янги ҳукумати тузилагани эълон қилинди.
Эслатиб ўтамиз, аввалроқ юзлаб афғон элчиларининг тақдири номаълум бўлиб қолаётгани хабар қилинганди.
