Юзлаб афғонистонлик дипломатлар келажаги номаълумлигича қолмоқда

 Афғонистонда тузилган маданият масалалари бўйича комиссия бу борада тез орада ТИВ қарори эълон қилинишини маълум қилди. Комиссия аъзоси Саид Хостийнинг фикрича, элчилар ва дипломатик миссиялар Ташқи ишлар вазирлиги билан маслаҳатлашмай, фаолиятини олиб бора олмайди. “Чет элдаги ваколатхоналар Ислом амирлиги манфаатларини ифода этиши керак. Ҳозирда ташқи ишлар вазирлиги мавжуд муаммоларни ўрганмоқда ва тез орада бир қарорга келади”,- деган Хостий. 
 Айрим афғон дипломатлари кейинги тақдиридан хавотирда. Шу сабабли улар турли давлатлардан сиёсий бошпана сўраган. Шунингдек, элчилар бир неча ойдан буён маош олмаган. Ҳозирда уларнинг кўпчилиги яшаш ҳаражатларига маблағ топа олмаяпти. Собиқ дипломат Абдулҳамид Жалилийнинг айтишича, элчихона ходимлари яқин орада маошларини олиши қийин. Жалилий Исломободдаги баъзи дипломатлар БМТ ва бошқа халқаро ташкилотлардан ёрдам сўраб, бошқа мамлакатларга чиқиб кетишга ҳаракат қилаётганини ҳам маълум қилди. 
 TOLO News билан суҳбатлашган айрим элчихоналар Афғонистоннинг янги ташқи ишлар вазири Амир Хон Мутаққий билан видеоконференция ўтказиш режалаштирилганлиги, бироқ кўплаб элчилар бу учрашувда қатнашишни инкор қилганини айтган. Шундан кейин бу тадбир бекор қилинган. 
Шу билан бирга Афғонистоннинг БМТдаги доимий вакили Ғулом Муҳаммад Исҳоқзай ташкилот бош котибидан ўз ваколатлари узайтирилишини сўраган. Шунингдек, Исҳоқзай 27 сентябрь кунги БМТ йиғилишида Афғонистон вакили сифатида иштирок этади. 
 Маълумот ўрнида: 15 август куни “Толибон” ҳаракати Кобулни эгаллаган. 31 августда АҚШ Афғонистонни тўлиқ тарк этди. Ҳаракат томонидан эгалланмаган ягона вилоят Панжшер вилояти эди. Аммо 6 сентябрда ушбу ҳудуд ҳам “Толибон” назоратига ўтди.  Шундан кейин толиблар 7 сентябрь куни мамлакатнинг янги ҳукумати тузилаганини эълон қилди.