АҚШ генерали Вашингтон учун қайси давлат асосий ҳарбий таҳдид эканини айтди. Бу Хитой эмас
АҚШ Қуролли кучлари шимолий қўмондонлик бошлиғи генерал Глен Ванхерк Россияни АҚШ учун энг асосий ҳарбий таҳдид сифатида баҳолади. Бу ҳақда у "Air Force Magazine" нашрига берган интервьюсида айтган.
“Бугунги кунда Россия Америка учун энг асосий ҳарбий таҳдид. Бу Хитой эмас, айнан Россия”,– деган генерал. Унинг сўзларига кўра, Пекин АҚШ учун узоқ истиқболдаги хавф. Лекин ҳозир РФ ўз сувости кемалари, бомбардимончи самолётлари ва қанотли ракеталари туфайли катта хавф бўлиб турибди. Шу билан бирга кибернетика ва космик дастурлар бўйича Пекин ва Москванинг кучи тенг, шу сабабли уларнинг ҳар иккисидан эҳтиёткор бўлиш керак.
Ванхерк Арктикада АҚШ позициясини кучайтириш мақсадида Пентагонни минтақага катта ресурсларни жалб қилишга чақирди. Акс ҳолда Вашингтон хавф остида қолади. Шунингдек, интервью давомида баллистик ракеталар худди ядро қуроли каби тийиб туриш воситаси эканини айтган.
Аввалроқ, АҚШнинг бошқа генерали Жон Хайтен Россия ва Хитой билан ҳарбий тўқнашув ҳақида фикр билдирган. Хайтен бу икки куч билан урушга йўл қўймаслик энг муҳим вазифа эканини айтганди.
Жаҳонгир Қўзиев
