Исломободдан Лондонга учаётган самолёт йўловчи аёлнинг ўлими туфайли Тошкентга фавқулодда қўнди
British Airways’нинг Исломободдан Лондонга учаётган Boeing 777-200ER самолёти 22 сентябрь куни Ислом Каримов номидаги Тошкент халқаро аэропортига қўнди. Бу ҳақда Telegram’даги «Новости Ташкентского неба» канали хабар берди.
Хабарга кўра, Буюк Британиянинг Исломобод—Лондон йўналиши бўйича учаётган ВА-260 рейси экипажи парвоз вақтида Тошкентдаги захира аэропортга қўниш ҳақида қарор қабул қилишга мажбур бўлган.
AviaSpotter’нинг соат 08:30 да эълон қилган маълумотига кўра, ушбу рейсдаги 83 ёшли йўловчи аёл ўзини ёмон ҳис қилган. Самолёт Тошкентга етиб келганида аёл вафот этган. Барча йўловчилар самолётдан туширилиб, Тошкент аэропорти ҳудудига жойлаштирилган.
“РИА Новости”нинг ёзишича, бу хабарни Тошкент аэропорти ходими тасдиқлаган. Унинг сўзларига кўра, аёлнинг ўлимига дастлабки сабаб — юрак хуружи бўлган. Аммо марҳуманинг қайси давлат фуқароси эканлиги маълум қилинмаган.
Бундан аввалроқ, Boeing-C-17 ҳарбий транспорт самолётида инсон танаси қолдиқлари аниқланганди.
Чўлпоной Аҳмедова
