Аҳмад Масъуд Россия билан алоқа ўрнатмоқчи
Аҳмад Масъуд кучлари Россия билан алоқа ўрнатмоқда. Бу ҳақда "Афғонистон миллий конгресси партияси" етакчиси Абдуллатиф Педрам маълум қилган.
Таъкидланишича, Педрам Аҳмад Масъуд ва собиқ вице-президент Амрулла Солиҳ билан бирга Тожикистондан сиёсий бошпана олган. "Биз "Толибон"га қаршиликни бир ой ичида расман эълон қиламиз", — деган Педрам. Унинг сўзларига кўра, қаршилик ҳаракати ҳозирда бадавлат афғонлар томонидан молиялаштирилмоқда. Лекин ҳаракат Россия томонидан қўллаб-қувватланишига ҳам умид қиляпти. Педрам ҳозирда қаршилик кучлари Москва билан "вазирлар даражасидан ташқарида" алоқа ўрнатганлигини айтган. Шунингдек, Тожикистон Президенти Эмомали Раҳмон Путин билан бўлажак учрашувида афғон қаршилик кучлари масаласини муҳокама қилиши мумкинлиги айтилмоқда.
Панжшер 6 сентябрь куни толиблар томонидан эгалланган. Аммо қаршилик кучлари раҳбари Аҳмад Масъуд кураш давом этишини эълон қилган.
Бундан аввал АҚШ нима учун Афғонистонни тарк этгани ҳамда "Толибон" ядро қуролини қўлга киритиши мумкинлиги хабар қилинганди.
Жаҳонгир Қўзиев
