Францияда 200 дан ортиқ киши муддати ўтган вакцина билан эмланди
Францияда 260 киши муддати ўтган Pfizer вакциналари билан эмланган. Бу ҳолат Овернь – Рона – Альп ҳудудида юз берган.
Минтақавий соғлиқни сақлаш бошқармаси маълумотига кўра, ушбу партия вакциналари музлатгичдан 5 август куни олинган. Унинг муддати 5 сентябрда тугаган. Шунга қарамай, 7-21 сентябрь кунлари вакцинадан фойдаланилган. Қайд этилишича, эмланганлар орасида Луара департаментидаги коллежнинг 100 нафарга яқин ўқувчиси ҳам бўлган.
Маҳаллий мутахассислар ушбу вакциналар саломатликка жиддий зарар етказмаслигини, аммо юқори самарадорликка ҳам эга эмаслигини маълум қилди. Шу боис коллеж ўқувчиларига қайта эмланиш маслаҳат берилди.
Минтақавий соғлиқни сақлаш бошқармаси буни “мутахассисларнинг жамоавий хатоси” сифатида тан олди.
Аввалроқ АҚШда болалар ҳам коронавирусга қарши эмланиши ҳамда ЖССТнинг вакциналар тақсимотидаги нотенглик ҳақида маълумот бергани хабар берилганди.
Жаҳонгир Қўзиев
