"BepiColombo” космик аппарати Меркурийдан илк тасвирларни жўнатди
“BepiColombo” космик аппарати Меркурийнинг биринчи тасвирларини Ерга етказиб берди, деб хабар бермоқда Европа космик агентлиги.
Сайёранинг шимолий ярим шари сурати ундан 2420 км. олисдан олинган.
Қурилма сайёра бўйлаб режалаштирилган олтита парвоздан биринчисини амалга оширди, тасвирлар ва илмий маълумотларни йиғди. Кун давомида яна янги расмлар келиши кутилмоқда.
Қурилманинг камералари 1024х1024 пикселли қора ва оқ тасвирларни узатади.
“BepiColombо” космик кемаси Меркурийга ўз миссиясини 2018 йил 20 октябрда бошлаган. Кейинроқ Меркурийга иккита орбитер етказилади, улар 2025 йил декабригача сайёранинг таркиби, зичлиги, магнит майдони ва экосфераси ҳақида маълумотларни йиғиб, орбитада камида бир йил қолади.
Бундан аввал NASA келаси йилда Халқаро космик станцияга биринчи тижорат экипажини юбормоқчи экани ҳақида хабар қилган эдик.
Насиба Тўхтаева
