Уханда “ғойиб” бўлган журналист алоқага чиқди
Ухань шаҳридаги коронавирус билан боғлиқ ҳақиқий вазиятни кўрсатган журналистлардан бири узоқ вақтдан сўнг яна алоқага чиқди. Бу ҳақда “The Wall Street Journаl” хабар берди.
Чен Цюши 2020 йил Ухань шаҳридаги ҳақиқий вазиятни кўрсатиб берган. Айнан у коронавирус ҳақида дастлабки маълумотларни тақдим этган журналистлардан бири. Цюши ва яна икки мухбир 2020 йил 6-26 февраль оралиғида “йўқолиб қолган”. Улар Twitter ва YouТube орқали Уханда тўлиб кетган касалхона ҳамда “морг”лар ҳақида маълумот берганди. Ўтган йилнинг сентябрида Цюшининг дўсти Youtube орқали унинг саломатлиги яхшилигини, аммо ҳамон ҳукумат назорати остида эканини маълум қилган.
“Сўнгги бир йил ва саккиз ой давомида кўп нарсани бошдан кечирдим. Уларнинг айримлари ҳақида гапириш мумкин, айримлари ҳақида йўқ. Мени тушунасиз деган умиддаман”, –деган журналист.
Маълумот ўрнида: 2020 йилнинг январида Ухань шаҳрида аниқланган Covid-19 кейинчалик бутун дунёга тарқалди. Сўнгги маълумотларга кўра, ҳозирда бутун дунёда 4 миллиондан ортиқ инсон касаллик оқибатида вафот этган.
Аввалроқ БМТ дунё 2022 йил охирига қадар тўлиқ эмланиши зарурлигини маълум қилганди. Шунингдек, ЖССТ раҳбари вакциналар тақсимотидаги нотенглик ҳақида гапиргани хабар қилинганди.
Жаҳонгир Қўзиев
