Ўзбекистонда 2025 йилгача 18 та электр станция фойдаланишга топширилади
Уларнинг умумий қуввати 7 минг 331 МВт бўлиб, иссиқлик, қуёш ва шамол электр станцияларидан иборат бўлади. Бу ҳақда Энергетика вазирлиги ахборот хизмати маълум қилди.
Қайд этилишича, бу борада 18 та инвестиция битими имзоланган. Мазкур станциялар амалдаги электр энергиясининг 50 фоизини ишлаб чиқаради.
2021 йилда Тошкент вилояти Қибрай туманида умумий қуввати 710 МВт бўлган 3 та иссиқлик электр станцияси, Хоразм вилоятининг Янгиариқ туманида 2021 йил декабрь ойида қуввати 174 МВт бўлган иссиқлик электр станцияси фойдаланишга топширилади.
2023 йилда Навоий вилояти Кармана, Нурота ва Томди туманларида умумий қуввати 800 МВт бўлган 3 та қуёш ва битта шамол электр станцияси, Самарқанд вилояти Нуробод ва Каттақўрғон туманларида эса умумий қуввати 320 МВт бўлган 2 та қуёш фотоэлектр станцияси ишга туширилади.
Жиззах вилояти Ғаллаорол туманида қуввати 220 МВт бўлган қуёш фотоэлектр станцияси, Сирдарё вилояти Янгиер ва Ширин шаҳарларида қуввати 720 МВт бўлган 2 та иссиқлик электр станцияси қуриб битказилади.
2024 йилда Бухоро вилоятининг Пешку, Ғиждувон ва Бухоро туманларида умумий қуввати 1 270 МВт бўлган иссиқлик ва шамол электр станциялари, Қорақалпоғистон Республикасининг Қораўзак туманида қуввати 100 МВт бўлган шамол электр станцияси ишга туширилади.
2025 йилда эса Сурхондарё вилояти Шеробод ва Ангор туманларида умумий қуввати 2 017 МВт бўлган қуёш ва иссиқлик электр станцияси ишга туширилади.
Бундан аввал Қирғизистонда куз-қиш мавсумида кўча чироқлари ўчирилаётгани, бу йилги куз-қиш мавсумида мамлакатимизда электр энергияси қандай ҳолатда бўлиши ҳамда Сурхондарё ва Хоразмда электр станциялари қурилиши ҳақида хабар берилганди.
Оламгир Абдиев
