АҚШ ҳам "TikTok"га қарши

 

 

Ўқитувчи ва юристлар TikTok'дан “хавфли контентлар” билан курашишни талаб қилмоқда. Улардан бири “ўқитувчини уриш” деб аталади. Унга кўра, ўқувчи ўз мураббийи ёки мактаб ходимига секин зарба бериб, қочиб кетиши керак. Бу вазифа октябрь ойи учун берилган. Бундан ташқари сентябрь ойида “ҳожатхонани бузиш” челленжи ўтказилган.

 

Коннектикут штати бош прокурори Уильям Тонг TikTok бош директорига йўллаган мактубида иловани ислоҳ қилиш зарурлигини, шу орқали бемаъни контентларни тўхтатиш кераклигини таъкидлаган. Ўз навбатида, TikTok бу каби тенденциялар мавжуд эмаслигини қайд этди. Компания фикрича, юқоридаги ҳолатлар “бутун дунё педагогларини ҳақорат қилиш” ҳисобланади.

 

Жанубий Каролина штати Ланкастер округи мактаб транспорти ва хавфсизлиги бўйича директори Брайан Воган TikTok'даги вирусли видеороликлар оқибатида ёшлар орасида меъёрдан ортиқ дори истеъмол қилиш, тананинг турли соҳаларига зарар етказиш ва бошқа хавфли жисмоний ҳаракатлар сони ошиб кетганини маълум қилган. Воганнинг фикрича, мактаблардаги юқоридаги челленжлар TikTok'нинг хавфли контент тарқалиши устидан назорат ўрната олмаслигини кўрсатади. У, шунингдек, ўғрилик ва мулкнинг йўқ қилиниши шўхлик эмас, балки жиноят эканини таъкидлади.

 

Бундан аввал Ўзбекистонда ҳам TikTok'чилар жаримага тортилгани ҳамда TikTok дунёдаги энг кўп юкланган иловага айлангани хабар қилинганди.