Метрода бегона қизни ҳимоя қилган йигит аёвсиз калтакланди
Куни кеча ижтимоий тармоқларда Москва метросида учта йўловчи бир эркакни аёвсиз калтаклаётгани акс этган видеолавҳа тарқалди.
Бу ҳақда Daily Storm сайти ҳам хабар қилди.
Гувоҳлар берган маълумотга кўра, Романа Ковалёвнинг калтакланишига 3 нафар безори йўловчи нотаниш қизни ҳақорат қилаётгани сабаб бўлган. Роман Ковалёв жамоат жойда ноўрин ҳаракатлар содир этаётган йигитларни тартибга чақириб, ўзларини камтар тутишларини сўраган. Бу танбеҳ йигитларга ёқмаган. Бунинг оқибатида катта жанжал юзага келиб, Роман аёвсиз калтакланган. Йигитнинг боши, юз ва жағ қисми синиши, ички органларнинг эзилиши, тананинг турли қисмларида кўкариш аломатлари билан касалхонага ётқизилган.
Ҳуқуқ -тартибот ходимлари қоидабузарларни 2 соат ичида қўлга олди. Суриштирув жараёнида улар Москвага ишлаш учун келган доғистонлик фуқаролар эканлиги маълум бўлди. Ҳозирда полиция томонидан жанжал кўтарган фуқароларга жиноий иш очилган.
Роман Кавалёв «Звезда» ТВга берган интервьюсида, безориларнинг тўхтовсиз зарбасидан ҳушини йўқотганини, касалхонага қандай қилиб бориб қолганини ҳам эслай олмаслигини билдирган.
- Бош ва юз қисмимда ҳали ҳам шишлар бор. Шифокорларнинг айтишича, шишлар қайтгач, қайта томография қилиниб муолажа буюрилар экан. Энг ачинарлиси, кўзим яхши кўрмаяпти. Шифокорлар аста-секин тикланади, деб менга таскин беришмоқда. Бошимда жуда кўп шишлар бор. Тикилган жароҳатлар оғриқ беряпти. Бироқ шунга қарамай ўзим ҳимоя қилган қизнинг ота-онаси билан учрашиш учун бордим, — дейди Роман Кавалёв.
Доғистоннинг миллий сиёсат ва диний ишлар бўйича вазири Энрик Муслимов мазкур ҳолат юзасидан муносабат билдирар экан “бундай ҳатти-ҳаракатлар республика ёшларини обрўсизлантиради, уларнинг нафақат ўзи, балки оилалари номига ҳам доғ туширади”, — деб айтган.
Бундан аввал Москвада ҳижобли аёлни кўрикдан ўтказган шифокор калтаклангани ҳамда Тошкентда дзюдочи Камолиддин Расулов бошқа спортчи томонидан пичоқлаб, ўлдирилгани ҳақида хабар берилган эди.
Муножат Валиева
