Батумидаги бино қулаши билан боғлиқ ҳолат юзасидан уч киши ҳибсга олинди
8 октябрь куни Грузиянинг Батуми шаҳрида кўп қаватли турар-жой биносининг бир қисми қулаши билан боғлиқ ҳолат юзасидан уч киши ҳибсга олинди. Улар 9 кишининг ўлимида айбланмоқда. Бу ҳақда “Спутник Грузия” хабар берди.
Қулаган уй хонадонининг эгаси ва у ёллаган ишчиларни икки йилдан беш йилгача қамоқ жазоси кутмоқда.
"Суд ҳар уч айбланувчи учун ҳам қамоққа олиш чорасини танлади. Дастлабки суд мажлиси 1 декабрь соат 12:00 га белгиланган", — дейилади хабарда.
Айбланувчиларнинг адвокати уларни гаров эвазига озод қилишни талаб қилди, аммо судья унинг талабини қондирмади.
Қайд этилишича, судланувчилар 4-8 октябрь кунлари бинонинг биринчи қаватида таъмирлаш ишларини олиб борган. Улар деворлар, шу жумладан, юк кўтарувчи деворларни ҳам бузиб ташлади. Бу эса уй барқарорлиги бузилиши ва унинг қулашига олиб келди.
Оқибатда тўққиз киши ҳалок бўлди. Уларнинг уч нафари вояга етмаган болалар. Бир кишининг аҳволи оғирлигича қолмоқда.
Бундан аввал Ксения Собчак ўтирган автомобиль Адлер яқинидаги катта трассада “Volkswagen" билан тўқнашгани, бунинг оқибатида "Volkswagen" ҳайдовчиси ва ичидаги йўловчи воқеа жойида ҳалок бўлгани ҳақида хабар берилганди.
Насиба Тўхтаева
