Доллар халқаро захира валютаси мақомини йўқотиши мумкин — Жаннет Йеллен
Конгресс давлат қарзи чегараси бўйича келишувга эришмаса, Вашингтонни молиявий инқироз кутади. Бу ҳақда АҚШ молия вазири Жаннет Йеллен маълум қилди.
“Бизнинг энг асосий вазифамиз — давлат қарзи чегарасини кенгайтириш”, – деган у. Вазирнинг фикрича, бу энг аввало Конгресс ташаббусларини амалга ошириш учун зарур. Ушбу масала юзасидан келишувга эришмаслик, ўз навбатида, ижтимоий тўловлар тўланишининг кечикишига олиб келиши қайд этилди.
“Молия вазирлигининг қимматли қоғозлари – жаҳондаги энг ишончли активнинг обрўсига путур етади, шунингдек, доллар халқаро резерв валюта мақомини йўқотади”, — деган Йеллен.
Шунингдек, келишувга эришмаслик – молиявий инқирозга ва ҳалокатга олиб келиши таъкидланди. 7 октябрь куни АҚШ Сенати қўшимча 480 миллиард доллар қарз олишга рухсат берди. Бу ҳукуматнинг 3 декабргача бўлган харажатларини қоплашга имкон беради.
Бундан аввал АҚШни техник дефолт кутаётгани хабар қилинганди.
Жаҳонгир Қўзиев
