"Очиқ ва профессионал": АҚШ "Толибон" билан музокараларга баҳо берди
АҚШ давлат департаменти "Толибон" билан ўтган музокараларни "очиқ ва профессионал" деб баҳолади. Бу ҳақда давлат департаменти матбуот хизмати раҳбари Нед Прайс маълум қилди.
" Музокаралар очиқ ва профессионал руҳда ўтди. АҚШ делегацияси яна бир бор толибларнинг сўзларига қараб эмас, ҳаракатларига қараб баҳо беришини таъкидлади", деган у. Прайснинг сўзларига кўра, Вашингтон вакиллари хавфсизлик ва терроризмга қарши кураш, инсон ҳуқуқлари, шунингдек, эвакуация масалаларини муҳокама қилган. Шу билан бирга тўғридан тўғри афғон халқига гуманитар ёрдам етказиб беришга ҳам тўхталиб ўтилган.
Ўз навбатида, "Толибон" ҳам ўтган музокараларни ижобий баҳолаган. Делегация аъзоларидан бири Ҳайриддин Хайрхох бу учрашув толиблар ҳокимиятини тан олинишига ёрдам беришига умид билдирган. Шунингдек, АҚШ гуманитар ёрдам беришга рози бўлгани маълум қилинган.
Бундан аввал АҚШ ва "Толибон" ўртасида музокаралар ўтказилиши ҳамда толибларнинг Афғонистон шимолида назоратни йўқотаётгани хабар қилинганди.
Жаҳонгир Қўзиев
