Ҳинд журнали Ўзбекистондаги таълим ва илм-фан интеграциясини эътироф этди
Ҳиндистоннинг "The Diplomatist" журналида "Ўзбекистонда таълим ва илм-фан интеграцияси борасида эришилган муваффақиятлар" сарлавҳали мақола чоп этилди. Бу ҳақда "Дунё" АА хабар бермоқда.
Қайд этилишича, Ўзбекистон Инновацион ривожланиш вазирлиги маълумотлари асосида тайёрланган ушбу мақолада юртимизда илм-фан соҳасини ривожлантириш, ушбу йўналишдаги ўзгаришлар ҳамда ислоҳотларнинг мазмун-моҳияти атрофлича баён қилинган.
"Ўзбекистонда илм-фан ва таълим ўртасидаги интеграцияни таъминлаш мақсадида ўтган 2020 йилда Фанлар академиясининг 65 нафар академиклари республиканинг академик лицейлари, касб-ҳунар коллежлари, олий таълим муассасалари ва хўжалик ташкилотларига бириктирилди, — деб ёзади нашр. — Бундай фаолият таълим жараёнига олимларни жалб этиш билан биргаликда, илмни ёшартириш ҳамда илмни омма учун кенг тарғиб қилиш учун босқичма-босқич эришишни ҳам назарда тутади".
Ҳинд журналининг таърифлашича, мамлакатда энг муҳим ҳодисалардан яна бири — илмий ва илмий-педагог кадрларнинг ижтимоий мақомини юксалтириш йўлида ҳам моддий рағбат, ҳам тарғибот ишлари йўлга қўйилган.
Таъкидланишича, "Ўзбекистонда ўтган уч йил ичида 3 мингдан ортиқ ўзбекистонлик ёшлар нуфузли халқаро университетларда таҳсил олиб қайтди. Бу, ўз навбатида, Ўзбекистонда илм-фан келажаги ишончли қўлларда эканлигидан далолатдир", — деб ёзади "The Diplomatist".
Аввалроқ "The Korea Herald" газетаси Ўзбекистондаги муҳим тадбирларни ўз саҳифаларида кенг ёритиши ҳамда Туркияда нашр этиладиган "Yazar" газетаси саҳифасида “Ҳар бир инсон кўриши керак бўлган мамлакат: Беруний, Нақшбандий, Бухорий ва Термизийнинг диёри – ЎЗБЕКИСТОН” сарлавҳали мақола чоп этилгани ҳақида хабар берилганди.
