Назарбоев Донишмандлар Кенгаши раҳбари лавозимига тайинланиши мумкин
Қозоғистон президенти Қосим-Жомарт Тоқаев мамлакатнинг биринчи президенти Нурсултон Назарбоевни Осиёда ўзаро ҳамкорлик ва ишонч чоралари конференцияси Донишмандлар Кенгаши раҳбари лавозимига таклиф қилди. Бу ҳақда Қозоғистон ташқи ишлар вазири ўринбосари Акан Раҳметуллин айтиб ўтди.
Сешанба куни Нур-Султонда Осиёда ҳамкорлик ва ишонч чоралари бўйича Кенгашга аъзо мамлакатлар ташқи ишлар вазирларининг VI йиғилиши бўлиб ўтди.
Қозоғистон ЕХҲТ ва МХҲМ салоҳиятини бирлаштиришни таклиф қилмоқда.
Учрашувда Раҳметуллин шундай дейди:
“Бугун биз Донишмандлар Кенгаши тўғрисидаги низомни тасдиқлаймиз. Эрталаб биз билан бўлган учрашувда, президент Қосим-Жомарт Тоқаев Осиёда ҳамкорлик ва ишонч чоралари бўйича Кенгаш асосчиси жаноб Назарбоевни Донишмандлар кенгаши раҳбарлигига таклиф қилди. Умид қиламанки, сиз бу номзодни маъқуллайсиз”.
Маълумот ўрнида, ташкилотнинг Донишмандлар Кенгаши ишонч чораларини кучайтиришнинг турли йўналишлари бўйича ҳамкорликни фаоллаштириш учун тавсияномалар ишлаб чиқиш мақсадида тузилган.
Осиёда ҳамкорлик ва ишонч чоралари бўйича Кенгаш - минтақавий муаммоларни муҳокама қилиш ва амалий ҳамкорликни ривожлантириш учун умумий Осиё мулоқот платформаси ҳисобланади. У 1992 йилда Қозоғистон ташаббуси билан ташкил этилган бўлиб, фаолияти Осиёда хавфсизликни таъминлаш соҳасида мулоқот қилиш, қарорлар қабул қилиш ҳамда чора-тадбирларни амалга ошириш учун шароит яратишга қаратилган. Аъзолари эса минтақанинг 27 та ҳудудида жойлашган. Унда 8 та мамлакат ва 5 та Халқаро ташкилот кузатувчи сифатида қатнашади.
Эслатиб ўтамиз, аввалроқ Қосим-Жўмарт Тоқаев Қозоғистон “Толибон” билан ишчи алоқалар ўрнатишга тайёрлиги ҳақида хабар берилган эди.
Чўлпоной Аҳмедова
