Самарқандда ёнган “MAN” ҳақида маълумот берилди
Самарқандга кетиш йўлида “Фура” юк машинасида ёнғин чиққани юзасидан ФВВ расмий маълумот берди.
Унда айтилишича, 12 октябрь куни соат 23:38 да Самарқанд вилояти Булунғур тумани “Олмазор” МФЙдан ўтган М-39 йўлининг 1048 км.да ҳаракатланаётган “MAN” русумли тиркамали юк автомашинасида ёнғин чиққан. Бу ҳақида туман ФВБга хабар келиб тушган.
Энг яқин ёнғин ўчириш қисм ёнғин содир бўлган манзилдан тахминан 18 км. масофада жойлашгани уни тезда бартараф этишда қўл келган.
Юз берган муаммоли вазиятни ҳал қилиш учун 2 та ёнғин-қутқарув экипажи воқеа жойига соат 00:01 да етиб борган. Соат 00:05 да ёнғин қуршаб олинган ва соат 01:12 да ўчирилган.
Ёнғин оқибатида юк автомашинасининг тиркамасига юкланган тахминан 25 тонна полиэтилен рулонлар ёниб, зарарланган. Ҳалок бўлган ва жабрланганлар йўқ.
Ҳозирда ёнғин сабаби ва етказилган моддий зарар миқдори аниқланмоқда.
Бундан аввал Жиззахда юк машинаси, Тошкентда йўловчи ташувчи “Газель” ҳамда Қорақалпоғистонда станцияда турган вагон ёниб кетгани ҳақида хабар берилганди.
Оламгир Абдиев
