“Толибон” ҳукумати Афғонистонда кўкнори етиштиришни камайтира олади...ми?
Маълумки, “Толибон” ҳокимиятга келган дастлабки кунларданоқ Афғонистонда гиёҳвандликка қарши кескин кураш олиб боришини маълум қилган эди. Шу боис, айни пайтда кўчаларда тўдалашиб турган гиёҳвандлар қўлга олиниб, касалхоналарга мажбурлаб олиб кетилмоқда.
Лекин шундай бўлса-да, “Толибон” афюн савдосидан катта даромад кўриши айтилади. “Толибон” эса доимо буни инкор этиб келади.
Қайд этилишича, дунёда мусодара қилинган морфин ва героиннинг 80 фоиздан ортиғи Афғонистонда етиштирилган.
Маълумотларга кўра, БМТнинг Гиёҳванд моддалар ва жиноятчиликка қарши кураш идорасининг Афғонистон Миллий статистика ва ахборот бошқармаси билан ҳамкорликда ўтган йили ўтказган тадқиқоти натижаси шуни кўрсатдики, Афғонистонда 2020 йилда кўкнор етиштириш 2019 йилга нисбатан 37 фоизга ошган. Жами 6300 тонна афюн етиштирилган.
2020 йилда 224 минг гектар ерда кўкнори экилган. 2019 йилга нисбатан 61 минг гектарга кўпайган.
Эслатиб ўтамиз, бундан аввал Ҳиндистонда Афғонистондан кириб келган 3 тоннага яқин героин аниқлангани ва “Толибон” Россияни гиёҳвандликка қарши курашда ҳамкорликка чақиргани ҳақида хабар берилганди.
Чўлпоной Аҳмедова
