Islohotlar.uz' платформаси сиз қолдирган изоҳни махфий сақлайди

 

Мазкур платформа Ҳаракатлар стратегияси доирасида амалга оширилган барча ислоҳотлар ва уларнинг натижалари ҳақидаги маълумотларни содда ва оммабоп кўринишда ўз ичига жойлаган.

 

Жумладан, уни яратиш жараёнида, "Tараққиёт стратегияси" маркази ҳамда Ўзбекистон Республикаси Президенти ҳузуридаги Стратегик ва минтақалараро тадқиқотлар институти (СМТИ) мутахассислари томонидан давлат органларининг расмий рақамлари ва статистикалари ўрганиб чиқилган. Шунингдек, халқаро ташкилотларнинг ҳисоботлари, хорижий экспертлар ва фуқаролик жамиятининг баҳолашлари ҳам таҳлил қилинган. Саралаш натижасида 70 дан ортиқ вазирлик ва идоралар томонидан тақдим қилинган 1 200 дан зиёд ҳужжатлар ичидан 400 дан ортиқ энг муҳимлари тушунарли бўлган халқона тилда платформага жойлаштирилди.

 

“Islohatlar.uz” платформаси хорижликлар учун ёки бошқа тилли фуқаролар учун ҳам хизмат кўрсатади. Бунда фойдаланувчи “reforms.uz” деб интернет тармоғида қидирув бериши лозим.

 

Платформанинг қулайлиги шундаки, фойдаланувчи стратегия бўйича таклифларини ҳам бериб бориши мумкин.

 

— Платформага ташриф буюрувчи қолдирган изоҳини бошқалар кўролмайди. Уни фақат сайтдаги мутахассислар кузатиши мумкин. Улар фойдаланувчининг танқид-таклифларини қабул қилишади. Жавоб беришади. Мақсад, фойдаланувчининг исм-шарифи махфий сақланишидир. Бундан ташқари, агар у ноўрин сўз ишлатса, уни кўрган бошқаларнинг фикри ҳам салбий бўлиши мумкин. Буларнинг олдини олиш мақсадида махфийлик муҳимдир, — дейди Элдор Туляков.

 

Сайтдаги барча рақамлар таққосланувчи шаклда келтирилган бўлиб, кузатувчилар 1991 йилдан 2016 йилгача ва 2017 йилдан 2021 йилгача бўлган вақт оралиғидаги барча маълумотларни таққослаб кўришлари мумкин. Энг муҳими, маълумотлар платформага ўзбек, рус ва инглиз тилларида жойлаштирилган.

 

Аввалроқ ИТБ янги рақамли платформа ҳамда Covid-19 билан боғлиқ чат-бот ишга тушгани ҳақида хабар берилганди.