Газни ёз бўйи тузатишса бўлмайдими?

 

Шу боис куз-қиш мавсумида хонадонларда газга бўлган эҳтиёж ортади. Ёзнинг қайноқ кунлари тугаб, кузнинг салқин шамолларида иссиқ уйимиз жонга ора киради. Шундай пайтда телефонинггиздаги хабарларни кўздан кечириб чиқасиз. Улар орасида сиз яшаб турган ҳудудда таъмирлаш ишлари сабабли ярим кун давомида газ таъминотида узилиш бўлиши ҳақидаги хабарга кўзингиз тушади. Шунда ҳаммамизда бир савол пайдо бўлади: шу ишларни нега ёз бўйи қилишмайди?

 

Биз ҳам мутасаддиларга ана шундай савол билан юзландик. "Ҳудудгазтаминоти" матбуот котиби Меҳрибон Маметова қуйидагича жавоб берди:

—Газ таъминотидаги таъмирлаш ишлари куз ё қишни кутиб ўтирмайди. Ҳар йили мартдан ноябрь ойи бошигача янги мавсумга тайёргарлик ишлари олиб борилади. Республика ҳудудида минглаб километрга чўзилган газ қувурлари мавжуд. Улар иккига — ички ва ер усти газ турбаларига ажралган. Буларнинг барчасини текшириш, тозалаш, тузатиш ёки янгилаш керак. Совуқ мавсум давомида режалаштирилган ва режалаштирилмаган тасодифий авариялар ҳам газ тармоғидаги узилишларга сабаб бўлади. Бундан ташқари янги ҳудудларни газ билан таъминлаш ишлари ҳам амалга оширилади. Ҳар бир газ тармоғи узилиши олдидан аҳолини албатта огоҳлантирамиз.

 

Суюлтирилган газ баллонлари аҳолига ҳар 30-35 кун ичида етказиб берилади. "Ҳудудгазтаъминот" берган хабарга кўра, бу йўналишда ҳам смс хабарнома тизими йўлга қўйилади. У орқали аҳолига газнинг етказиб бериш вақти олдиндан хабар қилинади. Шунингдек, "Ҳудудгазтаъминоти" куз-қиш мавсумига тўлиқ тайёргарлик кўрилганлигини маълум қилди.

 

Аввалроқ, аҳолининг газдан қарийб  ярим триллион қарздорлиги ва газдан ноқонуний фойдаланаётган Учкўприк туманидаги корхона ҳақида хабар бергандик.

 

Юлдуз Рустамова