ИШИДни Афғонистон халқи қўллаб-қувватламайди — “Толибон” вакили
“Толибон” Путиннинг Афғонистондаги ИШИД хавфи тўғрисидаги фикрларига муносабат билдирди. Бу ҳақда “Толибон”нинг маданият бўйича қўмитаси вакили Иномулла Саманганий TOLONews га берган интервьюсида айтиб ўтган.
Саманганийнинг сўзларига кўра, ИШИД Афғонистоннинг ҳеч қайси қисмида аҳоли томонидан қўллаб-қувватланмайди. “Мамлакат шимолида террорчилар мавжудлиги тўғрисидаги баёнотлар асосга эга эмас”, – деган Саманганий.
Бундан аввал Россия президенти Владимир Путин МДҲга аъзо давлатлар раҳбарлари кенгашида ИШИДнинг асосий мақсади –– этник ва диний низоларни қўзғаш эканини, шу орқали бутун Марказий Осиёга таъсир кўрсатишга уринаётганини маълум қилган. Шунингдек, террорчилар МДҲ ҳудудига қочқинлар кўринишида киришга ҳаракат қилаётгани таъкидланди.
Россия ташқи ишлар вазири ўринбосари Андрей Руденко эса “Толибон” Афғонистон шимолида аста-секин назорат йўқотаётганига эътибор қаратган.
Аввалроқ Ўзбекистон ТИВ “Толибон” билан музокаралар юзасидан баёнот бергани ҳамда Қандаҳорда ИШИД теракт уюштиргани хабар қилинганди.
Жаҳонгир Қўзиев
