Давлат раҳбарининг кўкрак нишони ва штандарти жорий қилинади
Бугун, 18 октябрь куни Олий Мажлис Қонунчилик палатасининг навбатдаги мажлиси бўлиб ўтмоқда. Мажлисда “Ўзбекистон Президенти фаолиятининг асосий кафолатлари тўғрисида”ги қонунга қўшимча киритиш ҳақида”ги қонун лойиҳаси муҳокама қилинди.
Адлия вазирлиги жамоатчилик билан алоқалар бўлимининг хабар беришича, қонун лойиҳасини депутатларга Адлия вазири Русланбек Давлетов тақдим қилди.
Қайд этилишича, қонун лойиҳаси билан Ўзбекистон Республикаси Президентининг фарқловчи белгилари, яъни кўкрак нишони ва штандарти (байроғи) юзасидан қоидалар киритилмоқда.
Хорижий давлатларда давлат раҳбарининг кўкрак нишони ва штандарти янги сайланган Президентга қасамёд қабул қилгандан кейин топширилиши белгиланган. Ўзбекистон Республикаси қонунчилигида ушбу масалалар тартибга солинмаганлиги боис, қонунчиликни тегишли мазмундаги норма билан тўлдириш таклиф этилмоқда.
Мазкур тартиб лавозимга сайланган шахсни президентлик лавозимига юклатилган мураккаб вазифаларни самарали амалга оширишига халқ ва жамият томонидан билдирилган ишонч белгиси сифатида хизмат қилиши таъкидланди.
Аввалроқ Ўзбекистонда “Янги Ўзбекистон ислоҳотчиси” кўкрак нишони таъсис этилиши ҳамда чемпион спортчиларнинг ота-оналари "Меҳнат фахрийси" кўкрак нишони билан тақдирлангани ҳақида хабар берилганди.
Ширин Холматова
