Ўзбекистонга Pfizer/BioNTech вакцинасининг навбатдаги партияси олиб келинди
Ҳозиргина юртимизга Pfizer/BioNTech вакцинасининг 526 500 дозалик яна бир партияси олиб келинди. Бу ҳақда Соғлиқни сақлаш вазирлиги матбуот хизмати хабар бермоқда.
Қайд этилишича, Ўзбекистонга олиб келинган Pfizer/BioNTech'нинг умумий миқдори 1726 500 дозага етди. Шундай қилиб, юртимизда эмлаш бошланганидан бери келтирилган вакцина миқдори эса 29 214 488 дозани ташкил қилмоқда.
Маълум қилинишича, юртимизда ота-оналар ва васийларининг розилиги асосида ихтиёрий равишда 12 ёшдан катта болаларни ҳам Pfizer/BioNTech вакцинаси билан эмлашга рухсат берилган.
Маълумот учун, Ўзбекистонга келтирилган ва ишлаб чиқарилган вакциналар миқдори 29 миллион дозадан ошди. 14 октябрь ҳолатига кўра, 151 124 нафар 12 ёшдан 18 ёшгача бўлган болалар Pfizer вакцинаси билан ихтиёрий равишда эмланди.
Эслатиб ўтамиз, бундан аввал ушбу вакцинадан 1 200 000 доза келтирилган эди. Айни пайтда Ўзбекистонда "ZF-UZ-VAC2001", "AstraZeneca", "Sputnik V" ва "Moderna" вакциналаридан фойдаланилмоқда. Pfizer/BioNTech вакцинаси Ўзбекистонда қўлланаётган 5-вакцина бўлди.
Аввалроқ Ўзбекистонга “Sinovak” вакцинаси олиб келингани, Ўзбекистонга "Sputnik V" вакцинасининг навбатдаги партияси келтирилиши ҳамда Ўзбекистон вакцина захираси бўйича МДҲ мамлакатлари орасида етакчи бўлгани ҳақида хабар берилганди.
