Сенат томонидан икки нафар судья Олий суд судьялигига тасдиқланди
Сенат Ойбек Баракабаев ва Дониёржон Тожибоевни ўн йиллик муддатга Ўзбекистон Республикаси Олий суди судьяси лавозимига тасдиқлади. Бу ҳақда Сенат ахборот хизмати хабар берди.
Қайд этилишича, Сенатнинг XX ялпи мажлисида сенаторлар Ўзбекистон Республикаси Олий суди таркибига ўзгартиришлар киритиш тўғрисидаги масалани кўриб чиқди.
Ўзбекистон Конституциясининг 80-моддаси 3-банди ва “Ўзбекистон Республикаси Олий Мажлисининг Сенати тўғрисида”ги конституциявий қонуннинг 9-моддаси биринчи қисми 3-бандига мувофиқ Ойбек Баракабаев ва Дониёржон Тожибоев ўн йиллик муддатга Ўзбекистон Республикаси Олий судининг судьяси лавозимига тасдиқланди.
Маълумот учун: Ойбек Баракабаев 2018 йилдан ҳозирга қадар Андижон вилоят маъмурий суди судьяси лавозимида, Дониёржон Тожибоев 2017 йилдан ҳозирга қадар Наманган вилоят маъмурий суди судьяси, Наманган туманлараро муъмурий суди раиси лавозимларида ишлаб келган.
Эслатиб ўтамиз, Сенат ялпи мажлисида “Ўзбекистон Республикасининг Солиқ кодексига аҳолини асосий турдаги озиқ-овқат маҳсулотлари билан кафолатли таъминлашга қаратилган қўшимча киритиш тўғрисида”ги қонун кўриб чиқилганди.
Бундан аввал Сенат томонидан жорий йил учун давлат бюджети харажатларига оид ҳужжат тасдиқлангани, айрим озиқ-овқат маҳсулотлари қўшилган қиймат солиғидан озод этилиши мумкинлиги ҳамда қадимий шаҳарларда божсиз савдо қилувчи “Duty Free” дўконлари очилиши ҳақида хабар берилганди.
