"Оrion" космик кемаси келаси йилнинг февраль ойида Ой орбитасига чиқарилади
"Биз февраль ойида тахминан 15 кунлик миссияни режалаштираяпмиз", - дейди Сарафин.
Келаси йилнинг февраль ойида "Оrion" космик кемаси "Артемис" дастури доирасида "Космик учириш тизими" ёрдамида Ой орбитасига чиқарилади. Бу ҳақда “Артемис-1” миссияси раҳбари, NASA вакили Майк Сарафин маълум қилди, деб ёзади “Интерфакс-Украина”.
"Биз февраль ойида тахминан 15 кунлик миссияни режалаштираяпмиз", - дейди Сарафин.
Эслатиб ўтамиз, “Артемис” дастурида иштирок этиш тўғрисидаги битим 2020 йилнинг 15 октябрь куни 8 давлат – АҚШ, Буюк Британия, Италия, Канада, Австралия, Япония, Бирлашган Араб Амирликлари ва Люксембург томонидан имзоланган эди. Дастурга Украина ҳам қўшилди.
Дастурнинг асосий вазифаси — 2024 йилда одамни Ой юзасига хавфсиз тарзда етказиш, шунингдек, у ерда станция қуриш ва Ойни колонизация қилиш учун шароит яратишдан иборат.
Аввалроқ миллиардер Ричард Брансон Ойда меҳмонхона қурмоқчилиги, АҚШ космик компанияси парвозларини вақтинча тўхтатгани, "BepiColombo” космик аппарати Меркурийдан илк тасвирларни жўнатгани, Франция космосни забт этишда ўз ўрнига эга бўлиши кераклиги ҳамда NASA келаси йилда Халқаро космик станцияга биринчи тижорат экипажини юбормоқчи экани ҳақида хабар қилган эдик.
