"Ўзбекистон маданий мероси жаҳон тўпламларида" лойиҳаси 5 йилдан буён амалда

 

Тадбирда сўзга чиққан Ўзбекистон Фанлар академияси академиги, Олий Мажлис Қонунчилик Палатаси Спикери биринчи ўринбосари Акмал Саидов ушбу лойиҳа улкан аҳамиятга эга эканини таъкидлади. “Тўпламлар ҳам илмий, ҳам тарбиявий аҳамиятга эга. Шунингдек, холлда "Ўзбекистон маданий мероси жаҳон тўпламларида" лойиҳаси Ўзбекистоннинг ташқи сиёсий имиджини яхшилашга хизмат қилади”, – деб фикр билдирди у.

 

“Ушбу муҳим тадбирда иштирок этаётганимдан хурсандман ва "Ўзбекистон маданий мероси жаҳон тўпламларида" лойиҳаси фаолиятини юқори баҳолайман. Бу лойиҳа  дунё миқёсида кенг тарқатилиши керак. Эндиликда китоб-альбомлар бизнинг ваколатхонамизни ҳам безайди ҳамда Ўзбекистоннинг ўта бой ва қадимий тарихи ҳамда маданиятининг яққол намунаси бўлади”, – деди ЮНЕСКОнинг Ўзбекистондаги ваколатхонаси раҳбари Александрос Макаригакис.

 

“Eriell Group” компанияси раисининг маданий-гуманитар масалалар бўйича маслаҳатчиси Юсуф Абдуллаев ҳам кириш сўзида ушбу лойиҳанинг нақадар муҳимлигини қайд этди. Унинг фикрича, "Ўзбекистон маданий мероси жаҳон тўпламларида" лойиҳаси  республикадаги илм—фан ривожига улкан ҳисса қўшмоқда. “Шу ўринда Бенжамин Франклиннинг 200 йил бурун айтган фикри ўринли : ‘Таълимга киритилган инвестиция энг мақбул инвестиция”, – деди Юсуф Абдуллаев.

 

Ўзбекистон маданий меросини ўрганиш, сақлаш ва оммалаштириш бўйича Бутунжаҳон жамияти раиси Фирдавс Абдухаликков лойиҳа жаҳоннинг турли давлатларидан кўплаб олимларни жамлаганини таъкидлади.

 

“Дунёнинг ўнлаб давлатларига сочилиб кетган маданий меросимизни тўплаш мақсадида 400 га яқин олимларни жамладик”, – деб қайд этди жамият раиси.

 

Тадбир давомида Ўзбекистоннинг 70 дан ортиқ музейларига 35 томлик китоблар жамланмаси тақдим этилди. Бундан аввал Маданий мерос агентлигининг вазифалари белгилангани ҳамда ЮНЕСКО Ўзбекистондаги айрим объектларни маданий мерос рўйхатидан чиқариши мумкинлиги хабар қилинганди.

 

Жаҳонгир Қўзиев