АҚШ Афғонистонга нисбатан жорий қилинган санкцияларни бекор қилиш керак— Хитой ташқи ишлар вазири
Ван Ининг фикрича, барча томонлар "Толибон" билан оқилона ва прагматик алоқалар ўрнатиши зарур.
Хитой ташқи ишлар вазири Ван И АҚШни Афғонистонга нисбатан жорий қилинган санкцияларни бекор қилишга чақирди. Бу ҳақда у Доҳада Афғонистон бош вазири ўринбосари Мулла Бародар билан учрашув пайтида айтган.
"Ҳозирда Хитой Афғонистон дуч келаётган гуманитар қийинчиликларга катта эътибор қаратмоқда. Пекин АҚШ ва Ғарбни ушбу мамлакатга қўйилган санкцияларни бекор қилишга қатъий чақиради", — деган Ван И. Унинг фикрича, барча томонлар "Толибон" билан оқилона ва прагматик алоқалар ўрнатиши зарур. Бу Афғонистоннинг барқарор тараққиёт йўлига тушиб олишига ёрдам беради.
"Хитой имкон қадар афғон халқига гуманитар ёрдам бериш, вақтинчалик қийинчиликларни енгиш мақсадида халқаро ҳамжамият билан алоқаларни мустаҳкамлаш ва иқтисодий тикланиш жараёнида ҳамкорлик қилишда давом этади", — деб айтган.
Ван И Пекин ҳеч қачон Афғонистон ички ишларига аралашмаганини ҳамда ўз шахсий манфаатлари йўлида ҳаракат қилмаганини алоҳида таъкидлади. Шунингдек, Хитой афғон халқининг тикланиши ва барқарорликка интилишини қўллаб-қувватлашини маълум қилди.
Хитой ТИВ раҳбари Доҳада икки кунлик ташриф билан бўлиб турибди. У сешанба куни толиблар делегацияси билан музокара ўтказади.
Бундан аввал ХХР раҳбари гегемонликнинг ҳар қандай шаклига қарши чиқиш зарурлигини айтганди. Шунингдек, АҚШ дипломати "Толибон" Афғонистон реаллиги эканини маълум қилганди.
Жаҳонгир Қўзиев
