Бутунжаҳон озиқ-овқат дастурининг Маскка таклифи ўз кучида турибди — БМТ
Аввалроқ БМТ Илон Маскни ўз бойлигининг бир қисмини очликка қарши курашга сарфлашга чақирганди.
БМТ бош котиби расмий вакили ўринбосари Фархон Хак Бутунжаҳон озиқ-овқат дастури директорининг Илон Маскка берган таклифи ўз кучида қолишини маълум қилди. Бу ҳақда “РИА Новости” хабар берди.
Аввалроқ БМТ бутунжаҳон озиқ-овқат дастури директори Дэвид Бизли “ҳалокат”нинг олдини олиш мақсадида Маскни ўз бойлигини хайрия қилишга чақирганди. Унинг сўзларига кўра, инсониятни очликдан асраш мақсадида SpaceХ асосчисининг 289 миллиард доллар бойлигининг 2 фоизи етарли.
Ўз навбатида Илон Маск агар 6 миллиард доллар ҳақиқатдан ҳам инсониятни қутқарса, Tesla’даги акцияларини сотишини маълум қилган.
“Бутунжаҳон озиқ-овқат дастури таклифи чин дилдан қилинган”, – деган Фархон Хак.
Олдинроқ Дэвид Бизли 6 миллиард доллар бутун инсониятни қутқара олмаслигини, аммо 42 миллион одамни очликдан асраб қолишини айтганди. Шу билан бирга у Маск билан учрашишга тайёрлигини маълум қилган.
Бундан аввал Илон Маск дунёнинг энг бой одамига айлангани хабар қилинганди.
Жаҳонгир Қўзиев
