Ироқ бош вазири қароргоҳига учувчисиз қурилма ёрдамида ҳужум уюштирилди
Оқибатда ўн киши жароҳатланган.
Якшанбага ўтар кечаси Ироқ бош вазири Мустафо ал-Козимийнинг қароргоҳига учувчисиз қурилма ёрдамида ҳужум уюштирилди. Бу ҳақда “ТАСС” хабар берди.
Козимий ўз Twitter саҳифасида унга ҳеч қандай зарар етмаганини маълум қилган. “Мен яхшиман ва халқ орасидаман. Ироқ учун барчани хотиржамликка чақираман”, – деган у. Маҳаллий ОАВ маълумотларига кўра, ҳужум оқибатида бош вазирнинг ўн нафар тансоқчиси жароҳатланган.
АҚШ давлат департаменти бу ҳодисани “очиқ кўриниб турган теракт” сифатида баҳолади. Шунингдек, Ироққа суриштирув олиб боришда ёрдам таклиф қилинган.
Бундан аввал ИШИД Ироқ армиясига ҳужум уюштиргани ҳамда ИШИД бош молиячиси қўлга олингани хабар қилинганди.
Жаҳонгир Қўзиев
