Озарбайжон ва Арманистон ТИВ раҳбарлари урушдан кейинги муносабатлар яхшиланиши масаласини муҳокама қилди
Дипломатлар учрашуви Парижда, ЕХҲТ воситачилигида ташкил этилган.
Парижда ташриф билан бўлиб турган Озарбайжон ташқи ишлар вазири Жайхун Байрамов Арманистонлик ҳамкасби Арарат Мирзоян билан учрашди. Бу ҳақда Озарбайжон ТИВ матбуот хизмати маълум қилди.
Томонлар Боку ва Ереван ўртасидаги муносабатларни нормаллаштириш масаласини муҳокама қилган. ТИВ маълумотларига кўра, учрашув ЕХҲТ Минск гуруҳи — Россия, АҚШ ва Франция ёрдамида ташкил этилган. Шунингдек, унда ЕХҲТнинг амалдаги раиси вакили Анджей Каспшик ҳам иштирок этган.
"Ташқи ишлар вазири Байрамов қарама-қарши тарафга урушдан кейинги Озарбайжон позицияси бўйича тушунтириш берди", — дейилган Озарбайжон ТИВ тарқатган хабарда.
Маълумот ўрнида: 2020 йил 27 сентябрда Озарбайжон ва Арманистон ўртасида жанговар ҳаракатлар кучайиб, урушга айланиб кетди. 2020 йил 10 ноябрга келиб Боку, Ереван ва Москва ўртасида уч томонлама келишув имзоланди ва ҳарбий ҳаракатлар тўхтатилди. Уруш якунида Озарбайжон Қорабоғнинг катта қисмида ўз суверенитетини тиклашга муваффақ бўлди.
Аввалроқ Қорабоғда халқаро аэропорт очилгани тўғрисида хабар берилганди.
Жаҳонгир Қўзиев
