"Давлат қарзи тўғрисида"ги қонун лойиҳаси Олий Мажлисга киритилди
Қонун лойиҳасида давлат қарзини бошқаришга доир асосий қоидалар ва давлат қарзининг ялпи ички маҳсулотга (ЯИМ) нисбатан энг юқори миқдори белгиланмоқда.
Ўзбекистон Президентининг фармонига асосан Молия вазирлиги томонидан ишлаб чиқилган "Давлат қарзи тўғрисида"ги қонун лойиҳаси Вазирлар Маҳкамаси томонидан Олий Мажлисга киритилди.
Маълумот учун: қонун лойиҳаси давлат қарзини бошқариш жараёни фрагментациялашувининг олди олиш, давлат қарзини барқарор даражада сақлаш, хорижий кредитор ва инвесторларнинг мамлакатнинг қарзларни тўлай олиш салоҳиятига бўлган ишончининг ортиши ҳамда давлат томонидан қарзларнинг қулай шартларда ва барқарор нархларда жалб қилиниши учун зарур муҳит шакллантиришга қаратилган.
Молия вазирлиги ахборот хизмати хабарига кўра, 10 та боб ва 58 та моддадан иборат қонун лойиҳасини тайёрлашда Жаҳон банки, Халқаро валюта жамғармаси, Осиё тараққиёт банки ва АҚШ Ғазначилигининг 13 нафар эксперти иштирок этган. Лойиҳа юзасидан 9 та вазирлик ва идоранинг экспертиза хулосалари олинган.
Шу билан бирга, Ўзбекистон Республикаси Президенти, Олий Мажлиси палаталари, Ҳисоб палатаси, Вазирлар Маҳкамаси, Марказий банк ва Молия вазирлигининг давлат қарзини бошқариш соҳасидаги ваколатлари ҳамда давлат қарзи тўғрисидаги маълумотлар очиқлигини таъминлаш, жумладан, ОАВда ёритиб бориш ва расмий веб-сайтларда чоп этиш бўйича қоидалар алоҳида кўрсатиб ўтилмоқда.
Шунингдек, қонун лойиҳасида давлат кафолатини бериш тизими такомиллаштириш қоидалари ва давлат қарзи бўйича хатарларни бошқариш бўйича амалга ошириладиган ҳаракатлар мажмуи акс эттирилмоқда.
Эслатиб ўтамиз, Ўзбекистоннинг ташқи қарзи ҳисоблаб чиқилганди.
Аввалроқ стратегик ташкилотларга газ учун оширилган коэффициент бекор қилингани ҳамда Ўзбекистон электр энергетика соҳаси учун ЕТТБдан 816 миллион евро қарз олаётгани ҳақида хабар берилганди.
