АҚШ Пекиндаги қишги олимпия ўйинларини бойкот қиладими?

 

Жозеф Байден АҚШ Пекиндаги қишги олимпиада ўйинларига делегация жўнатиш ҳақидаги саволга аниқ жавоб бермади.

 

Бу савол президентга унинг Нью-Гэмпшир аэропортидан учиб кетишидан олдин берилган. "Делегация менман ва мен бу масалани ҳал қилдим", — деган Байден.

 

АҚШ президенти администрацияси бу масалага ҳалигача изоҳ бергани йўқ. Оқ уй пресс-пули журналистлари Байденнинг жавоби аниқ бўлмаганини айтишмоқда. Улар, шунингдек, Байден саволни шунчаки эшитмаган бўлиши мумкинлигини ҳам таъкидлашган.

 

Маълумот ўрнида: май ойида АҚШ Конгресси вакиллар палатаси спикери Нэнси Пэлоси халқаро ҳамжамиятни Пекин олимпиадасини бойкот қилишга чақирганди. Унинг фикрича, дунёнинг етакчи давлатлари Олимпиадага ташриф буюришдан тийилишлари лозим. Аммо АҚШ миллий олимпия қўмитаси бойкотга қарши чиқди. Давлат котиби Энтони Блинкен эса 10 ноябрь куни Вашингтон олимпиадада иштирок этиш учун аниқ қарорга келмаганини маълум қилган.

 

Аввалроқ АҚШ-Хитой етакчилари ўртасида онлайн саммит бўлиб ўтгани ҳақида хабар қилинганди.

 

Жаҳонгир Қўзиев