АҚШ Хитойга қарши блоклар тузмайди — Жозеф Байден
АҚШ етакчиси бу ҳақда Си Цзинпинь билан виртуал учрашув пайтида маълум қилган.
АҚШ президенти Жозеф Байден ХХР раиси Си Цзинпинь билан видеоалоқа мулоқоти чоғида Хитойга қарши блок тузмасликка ваъда берди. Бу ҳақда Хитой марказий телевидениеси хабар берди.
“АҚШ ҳукумати узоқ истиқболда “Ягона Хитой”” сиёсатига таянади ва ‘Тайвань мустақиллиги’ни қўллаб-қувватламайди. Шунингдек, Тайвань бўғозида тинчлик ва барқарорлик сақланиб қолишига умид билдиради”, – деб Байденнинг сўзини келтириб ўтган телеканал.
Шунингдек, АҚШ етакчиси Хитой тузилишини ўзгартирмасликка ва Пекинга қарши блоклар тузмасликка ваъда берган. Байден ХХР билан низога киришиш нияти йўқлигини маълум қилган.
Аввалроқ Хитой АҚШни Тайвань масаласида огоҳлантиргани ҳамда АҚШ президентининг миллий хавфсизлик бўйича маслаҳатчиси Жейк Саливван Хитой билан муносабатларга тўхталиб ўтгани ҳақида хабар қилинганди.
Жаҳонгир Қўзиев
