Фарғона вилоятидан 253,5 тонна малина хорижга экспорт қилинди

 

Давлат божхона қўмитаси хабарига кўра, жами экспорт қилинган 253,5 тонна малинанинг 114,1 тоннаси Польшага, 50,7 тоннаси Қирғизистонга, 43,1 тоннаси Россияга, 38 тоннаси Туркияга ва 7,6 тоннаси Қозоғистонга юборилди.

 

Қайд этилишича, жорий йилнинг ўтган 10 ойи давомида умумий қиймати 578 минг долларлик малина Польша, Қирғизистон, Россия, Туркия ва Қозоғистон каби давлатларига бошқарманинг “Водий” ва “Марғилон” ташқи иқтисодий фаолият божхона постлари томонидан экспортга расмийлаштирилди.

 

Эслатиб ўтамиз, Фарғона тумани иқлими малина етиштириш учун мос эканлиги ҳисобга олиниб, янги резавор плантациялари учун 300 гектар бўш ва фойдаланилмаётган ер ажратилган. Ҳозирда қудуқларни бурғулаш ва насослар ўрнатиш ишлари бошланган.

 

Аввалроқ Ўзбекистон январь-сентябрь ойларида хорижга қанча миқдорда мева ва сабзавот экспорт қилгани маълум бўлганди. Шунингдек, узумчилик кластерлари ташкил этилиши, бодринг экспорти 2,5 миллион АҚШ долларига ошгани, Ўзбекистон 8,9 минг тонна шафтоли экспорт қилгани ҳамда Қорақалпоғистон Республикаси ва вилоятларда 44 та янги экспортбоп узум плантациялари яратилиши ҳақида хабар берилганди.