3 минг нафардан ортиқ фуқаро қидирувда
Уларнинг барчаси алиментдан қарздор.
Мажбурий ижро бюроси берган маълумотларга кўра жорий йил қарздорлиги туфайли 7 минг 800 дан зиёд жисмоний шахсга нисбатан қидирув эълон қилинган. Улардан 4 минг 500 нафардан (58%) ортиғи топилиб, мажбурий ижро ҳаракатлари ўтказилган.
Айни дамда 3 минг 264 нафар қарздорни қидириб топиш чоралари кўрилмоқда.
Маълумотларга кўра, ушбу шахсларнинг 2 минг 149 таси Республика ҳудудида яшириниб юрганлиги, 1 минг 115 таси эса, чет элга турли мақсадларда чиқиб кетганлиги аниқланган.
Қидирувдаги шахслар топилиши натижасида қарздорлардан жами 30 млрд 700 млн. сўм, шу жумладан 22 млрд 800 млн. сўм алимент пуллари ундирилиб, вояга етмаган фарзандларнинг моддий таъминот олишлари таъминланган.
Аввалроқ, 5 нафар болага алимент тўлашдан бош тортган отага нисбатан жиноят иши очилгани ҳамда алимент тўламаган 11 нафар ота қамоққа олингани ҳақида хабар берилганди.
Муножат Валиева
