Суғурта фаолиятига доир яна бир ҳужжат кучга кириш арафасида

 

Эслатма. Суғурта деганда муайян воқеа, яъни суғурта ҳодисаси юз берганда суғурта қилган шахсларга шартномага мувофиқ суғурта пулини тўлаш йўли билан инсон манфаатларини ҳимоя қилиш тушунилади. Бунда суғурта маблағлари юридик ёки жисмоний шахслар тўлайдиган суммадан шакллантирилади.

 

Янги қонунда суғурта таваккалчилиги, суғурта тарифи, франшиза, трансчегаравий суғурта ва бошқа шу каби асосий тушунчаларга изоҳ берилган. 

 

Унга кўра, суғурта бозорининг профессионал иштирокчилари, яъни суғурталовчилар, суғурта воситачилари, аджастерлар, актуарийлар, суғурта сювеерлари, ассистанснинг ҳуқуқ ва мажбуриятлари аниқ белгилаб қўйилди. Шу билан бирга, ҳужжатда суғурта қилдирувчи ва суғурталовчи ўртасида электрон шаклдаги ахборот алмашинувининг ўзига хос хусусиятлари кўрсатиб ўтилган. Шунга биноан, эндиликда суғурта шартномаси интернет орқали электрон шаклда тузилиши мумкин.

 

Эслатма. Қонун расмий эълон қилинган кундан эътиборан уч ой ўтгач кучга киради(яъни 2022 йил 25 февралдан бошлаб).

 

Маълумот учун, суғуртанинг 2 тури мавжуд:

• Ҳаётни суғурта қилиш – бунда жисмоний шахсларнинг ҳаёти, соғлиғи, меҳнат қобилияти ва пул таъминоти билан боғлиқ манфаатлари суғурталанади.

•  Умумий суғурта – мазкур турга шахсий, мулкий суғурта, жавобгарликни суғурта қилиш ва ҳаётни суғурта қилиш соҳасига тааллуқли бўлмаган бошқа суғурталар киради. Шунингдек, шакл жиҳатидан ихтиёрий ва мажбурий суғурта тушунчаси ҳам мавжуд.

 

Аввалроқ Суд қарори ёки ЙПХ ходими иштирокисиз суғурта товони олиш тартиби маълум қилингани ҳақида хабар берилганди. 

 

Оламгир Абдиев