Суд қарори ёки ЙПХ ходими иштирокисиз суғурта товони олиш тартиби маълум қилинди
Бугун, 19 октябрь куни АОКАда "Ўзагросуғурта" АЖ ахборот хизмати раҳбари Шуҳрат Қобилов иштирокида брифинг бўлиб ўтди. Унда мажбурий автосуғурта бўйича суд қарори ёки ЙПХ ходими иштирокисиз суғурта товони олиш тартиби бўйича маълумот берилди.
Қайд этилишича, йўл-транспорт ҳодисаси содир бўлганда иштирокчилар ҳуқуқни мухофаза қилувчи орган ходими иштирокисиз хабарнома тўлдириб тиббий наркологик текширувдан ўтади. Шунингдек, транспорт воситаларини техник шикастини баҳолаш экспертизасидан ўтказиб, 3 кун ичида суғурталовчига ариза тақдим этади.
Таъкидланишича, суғурталовчи ҳужжатларни ўрганиб, 15 кун ичида товон тўлаш ёки рад этиш тўғрисида қарор қабул қилади.
Маълумот учун: "Транспорт воситалари эгаларининг фуқаролик жавобгарлигини мажбурий суғурта қилиш тўғрисида"ги қонуннинг 3-моддаси "йўл-транспорт ҳодисаси тўғрисидаги хабарнома" тушунчаси билан тўлдирилди.
Бу содир этилган йўл-транспорт ҳодисаси ҳақида суғурталовчига хабар бериш учун йўл-транспорт ҳодисаси содир этилган жойда йўл-транспорт ҳодисасида иштирок этган ҳайдовчилар томонидан ихтиёрий равишда тўлдириладиган, транспорт воситалари эгаларининг фуқаролик жавобгарлиги вужудга келганлиги фактини тасдиқловчи ҳужжатдир.
Эслатиб ўтамиз, қонунчилик палатасининг навбатдаги йиғилишида “Маъмурий жавобгарлик тўғрисидаги кодексига ўзгартиш ва қўшимчалар киритиш ҳақида”ги қонун лойиҳаси иккинчи ўқишда кўриб чиқилган эди.
Аввалроқ суғурта полисини олмаганлик учун жарима икки бараварга камайтирилиши, ҳукумат қарори билан транспорт воситалари эгаларининг фуқаролик жавобгарлигини мажбурий суғурта қилиш қоидаларига ўзгартириш ва қўшимчалар киритилгани, Олий Мажлис Сенатининг ўн саккизинчи ялпи мажлисида “Суғурта фаолияти тўғрисида”ги қонун муҳокама қилингани ҳамда Ўзбекистонда "права"сиз машина ҳайдашга ва рулда телефондан фойдаланишга рухсат берилиши мумкинлиги ҳақида хабар берилганди.
