COVID-19'дан вафот этган тиббиёт ходимлари хотирасига хиёбон ташкил этилади
Биринчи босқичда 61 та дарахт экилади.
Тошкентда пандемия билан кураш давомида жонини фидо қилган тиббиёт ходимлари хотирасига бағишлаб хиёбон ташкил этилмоқда.
Бу ҳақда Тошкент шаҳар ҳокимлиги хабар қилди.
11 декабрь куни соат 10:00 да Ғалаба боғига кириш олдидаги майдончада Хотира хиёбонини ташкил қилиш ишларига старт берилади.
Биринчи босқичда чинорлар, қайрағоч ва акациялардан иборат 61 та дарахт экилади.
Ўзбекистон Ландшафт санъати уюшмаси ҳамда Олмазор туман ҳокимлиги Акциянинг бош ташкилотчиларидир. Хусусий компания ва шахсларнинг ҳомийлиги ҳам ишлар янада ривожланишига ёрдам беради.
Аввалроқ дарахт экиш ва парваришлаш масалаларига шаҳар ҳокимининг қурилиш бўйича ўринбосари масъул эканлиги ҳамда Кўп қаватли уйларга туташ ҳудудлардаги яшил майдонларда қурилиш қилишга рухсат берилмаслиги ҳақида хабар берилганди.
Муножат Валиева
