"Iyman textile"да келажак учун янги режалар яратилмоқда
Қашқадарё вилоятида ОАВ ходимлари учун пресс-тур ташкил этилди.
Бугун Ахборот ва оммавий коммуникасиялар агентлиги томонидан журналист ва блогерлар учун Қашқадарё вилоятининг айрим ишлаб чиқариш корхоналарида пресс-турлар ташкил этилди. Хусусан, ОАВ ходимлари Қарши туманида жойлашган "Iyman textile" тикувчилик мажмуаси билан яқиндан танишди.
- Мазкур корхонамизнинг очилганига атиги бир ой бўлди, - дейди "Iyman textile" тикувчилик мажмуаси директори Арсен Битикташ. Бугунги кунда ишлаб чиқариш зонамизда 55 нафарга яқин аёлларимизни иш билан таъминлаганмиз. Корхонамизда асосан талабга қараб маҳсулот тайёрлашга ҳаракат қилмоқдамиз. Энди фаолият бошлаганимизга қарамай 6 ойдан сўнг маҳсулотларимизни Россия ва Белоруссия давлатларига экспорт қилиш режаларимиз бор. Тикувчилик мажмуамизда ишчиларимизнинг ойлиги 900 минг сўмдан бошланади. Бироқ келгусида бу борада ҳам кўрсаткичларимизни ошириш ниятимиз бор. Ишхонамиздаги машиналар Туркия давлатидан келтирилган. Уларнинг умумий сони 30-35 тани ташкил этади. Келгуси йилларда фаолиятимизга қараб экспорт ҳажмига бор эътиборимизни қаратмоқчимиз.
- Мен ушбу тикувчилик мажмуаси очилганидан бери ишчи ходим бўлиб ишлаб келмоқдаман. Иш жойимизда шарт-шароитлар аъло даражада. Икки маҳал овқат беришади. Ҳар куни ишхонамизнинг махсус автобуси бизни уйимиздан олиб келади ва кечга яна олиб бориб қўяди. Ҳозирда 1 миллион 500 минг сўм ойлик оламан. Маошим оиламнинг айрим камчиликларини ёпишга етиб турибди. Кейинроқ иш ҳажми оширилганидан сўнг ойликларимиз ҳам ошиши мумкин. Бажарадиган юмушимиз ҳам унча қийин эмас. Биз маҳсулотнинг охирги қисмига ишлов берамиз. Кейин тайёр ҳолатга келтириш учун дазмоллашга юборилади, - дейди шу ерда ишлаётган ходимлардани бири Азимова Соҳиба.
Жамшидбек Амиров
