Олинг, олинг! Ҳеч ким кўрмайди, орамизда қолади!

 

Сурхондарё вилоятида ЙПХ инстпекторига 200 АҚШ доллари миқлорида пора таклиф қилган ҳайдовчи тезкор гуруҳ томонидан қўлга олинди. Бу ҳақда вилоят ИИБ ахборот хизмати хабар бермоқда. 

 

Қайд этилишича, жорий йилнинг 17 декабр куни Термиз шаҳри “Р.Соатова” кўчасида хизмат олиб бораётган кичик сержант Ходжаев Зафар ушбу кўчада ҳаракатланиб келаётган “Кобалт” автомашинасини тўхтатиб, ҳужжатларини текширганида, автомашинанинг орқа ён ойналари тегишли рухсатномасиз қорайтирилганлиги аниқлаган.

 

Инспектор ҳайдовчи Д.Т га нисбатан МЖТКнинг тегишли моддаси билан маъмурий баённома расмийлаштириб, бошқарувида бўлган автомашинани вақтинчалик жарима майдонига жойлаштирган. Шу пайт ҳайдовчи Д.Т ундан автомашинани жарима майдонидан чиқариб беришини илтимос қилиб, эвазига 200 АҚШ доллари миқдоридаги пул таклиф қилган. 

 

Шунда кичик сержант З. Ходжаев тегишли тартибда Сурхондарё вилояти ИИБ бошлиғи номига фуқаро Д.Т пора таклиф қилаётганлиги учун унга нисбатан қонуний чора кўришни сўраб билдирги билан мурожаат қилган. Билдиргига асосан, шу куни соат 17:50 ларда ўтказилган тезкор тадбир давомида, фуқаро Д.Т Термиз шаҳар ИИБ ЙҲХХ маъмурий биноси ёнида кичик сержант З.Ходжаевга бириктирилган хизмат автомашинасининг олд ўриндиғига ўтириб, 1.850.000 сўмни пора тариқасида берган вақтида ушланган.

 

Ҳозирда мазкур ҳолат юзасидан Термиз шаҳар прокуратураси томонидан терговга қадар текширув ҳаракатлари олиб борилмоқда.

 

Аввалроқ Наманганда қоидабузар ЙПХ ходимига пора таклиф қилгани хабар қилинганди.

 

Жавоҳирбек Турсунов