Namangan viloyat YHXBB matbuot xizmati xabariga ko‘ra, 1-dekabr kuni soat 08:00 larda Namangan viloyati, Pop tumani hududida joylashgan “Namangan” muntazam YPX maskanida xizmat olib borayotgan YPX xodimi tomonidan maskandan harakatlanib o‘tayotgan “Cobalt” to‘xtatilgan. Tekshiruv davomida avtomobilda 16 dona tegishli hujjatlarsiz televizorlar olib ketilayotgani maʼlum bo‘lgan va bayonnoma orqali tuman IIBga olib kelingan.
Maʼlum bo‘lishicha, haydovchi holat yuzasidan tegishli chora ko‘rilmasligi uchun YPX xodimiga 1000 dollar pul va 4 dona televizor berishni taklif qilgan. YPXO komandiri o‘rinbosari mazkur holat bo‘yicha viloyat IIB boshlig‘iga bildirgi orqali pora taklif qilayotgan fuqaroga qonuniy chora ko‘rilishini so‘ragan.
Bildirgi asosida huquqni muhofaza qiluvchi organ xodimlari hamkorligida tezkor tadbir o‘tkazilib, Pop tumani IIB maʼmuriy binosi yonida haydovchi, X.S. (1992-yilda tug‘ilgan) YPX xodimiga 900 dollarni pora tariqasida bergan vaqtda ashyoviy dalillar bilan ushlangan.
Mazkur holat yuzasidan hozirda tergovga qadar tekshiruv harakatlari olib borilmoqda.
Eslatib o‘tamiz, avvalroq avtomashinasini jarima maydonchasidan chiqarib berish evaziga inspektorga pora bermoqchi bo‘lgan shaxs, Surxondaryoda YPX xodimini kapotda sudrab ketgan haydovchiga chora ko‘rilgani hamda Toshkentda “Lacetti” haydovchisi YPX xodimiga bo‘ysunmay qochib ketgani haqida xabar berilgandi.