2021 йилда энг кўп молиявий зарар келтирган табиий офатлар
Британиянинг “Christian Aid” гуманитар ташкилоти маълумотларига кўра, 2021 йилда энг кўп моддий зарарга АҚШдаги “Ida” тўфони сабаб бўлган.
2021 йилда содир бўлган энг йирик ўнта табиий офат молиявий жиҳатдан жами 170 миллиард доллардан ортиқ зарар келтирди. Бу ўтган йилга нисбатан қарийб 20 миллиард долларга кўп. Умумий зарар миқдорининг қарийб 13 фоизга ошиши иқлимнинг антропоген ўзгариши оқибатларини акс эттиради, дея изоҳ берди Британиянинг Чристиан Аид гуманитар ташкилоти.
Маълумотларга кўра, август ойи охирида, АҚШдаги кучли сув тошқинига сабаб бўлган “Ida” тўфони 2021 йилда энг катта молиявий таъсир кўрсатган табиий офат сифатида қайд этилди. “Christian Aid” етказилган зарарни 65 миллиард долларга баҳоламоқда. Иккинчи ўринда – июль ойида Германия ва Белгиядаги сув тошқинлари, ҳукуматлар жами 43 миллиард доллар зарар кўрган.
Рўйхатга АҚШнинг Техас штатидаги кескин совуқ ҳарорат ва Хитойнинг Хенан провинциясидаги сув тошқини ҳам киритилган. Ташкилот бу рўйхатга асосан бой мамлакатларда содир бўлган табиий офатларга асосланганини қўшимча қилди.
Ҳисоботда айтилишича, қашшоқроқ мамлакатларда инфратузилма суғурталанмаганлиги сабабли табиий офатлардан кўрилган молиявий зарарни ҳисоблаш қийин.
Эслатиб ўтамиз, декабр ойида Индонезияда вулқоннинг отилиши оқибатида 13 киши ҳалок бўлган эди.
