Украина НАТО аъзоси бўлмайди — The New York Times
Бунга Европа давлатлари позицияси сабаб бўлиши мумкин.
Украина яқин келажакда НАТО аъзосига айланмайди. Бу ҳақда The New York Times маълум қилди.
Мақола муаллифининг фикрича, Киевнинг альянсга қўшилишига бир қатор омиллар халал бермоқда. Улардан бири — Европа давлатларининг розилиги. НАТОга янги иштирокчи киришидан аввал унинг барча аъзолари консенсусга эга бўлиши лозим.
Шунингдек, АҚШ расмийларининг баёнотларига қарамай, Жо Байден Украинанинг Шимолий Атлантика блокига қўшилиши масаласида доим эҳтиёткор бўлган ҳамда 2000 йиллар охиридан бошлаб унинг НАТОнинг шарққа кенгайишини қўллаб-қувватламай келади.
Вашингтон ва бошқа аъзоларни Украинадаги коррупция ҳолати хавотир уйғотади. Transparency International ташкилоти маълумотларига кўра, Киев коррупцияга қарши кураш рейтингида 180 давлат ичида 117 ўринни эгаллаган.
Хулоса ўрнида Россия фактори келтирилган. Москванинг Европага бир қанча иқтисодий таъсир воситалари мавжуд. Шунинг учун кўплаб европаликлар РФ билан муносабатларни кескинлаштирмасликка ҳаракат қилади.
"Буларнинг барчасини инобатга олиб Украина НАТОга аъзо бўлишнинг учинчи муҳим шартига жавоб бера олмайди: барча ўттиз давлатнинг розилиги", — дейилади мақолада.
Маълумот ўрнида: Украинанинг НАТО аъзолигига интилиши Россия ва Ғарб ўртасидаги энг зиддиятли масала ҳисобланади. Альянснинг Шарққа кенгайишига қаттиқ қаршилик кўрсатадиган Россия бевосита ўз чегаралари НАТО билан туташишига кескин норозилик билдириш келади. Ғарбнинг айрим стратеглари эса аксинча, Украинанинг ҳарбий блокка қўшилиши Москванинг империячилик кайфиятини тийиб турадиган омил сифатида кўради.
Аваалроқ Украинада Россия кемаларига қарши қаратилган қонун қабул қилинганди.
Жаҳонгир Қўзиев
