Аҳмад Масъуд тарафдорлари Франция собиқ президенти билан учрашди
Унда мамлакатдаги жорий вазият муҳокама қилинган.
Афғонистон миллий қаршилик кўрсатиш фронти Франция собиқ президенти Франсуа Олланд билан музокара ўтказди. Бу ҳақда “Sputnik Афганистан” хабар берди.
Миллий қаршилик кўрсатиш фронти ташқи алоқалар бўлими раҳбари Али Майсам Назарийнинг маълум қилишича, Олланд билан Афғонистондаги жорий вазият муҳокама қилинган. Ўсиб бораётган террор хавфи ҳам марказий мавзулардан бири бўлган.
Олланд Париж доимо афғонларнинг демократик ташаббусларини қўллаб-қувватлашини таъкидлаган.
Маълумот ўрнида: Афғонистон миллий қаршилик кўрсатиш фронти Панжшер кучлари етакчиси Аҳмад Масъуд ва Афғонситон собиқ вице-президенти Амрулла Солиҳ томонидан “Толибон” ҳаракатига қарши кураш мақсадида тузилган.
Масъуднинг Францияда позицияси анча кучли. 2021 йил Парижда унинг отаси, таниқли қўмондон Аҳмадшоҳ Масъуд шарафига хотира бурчаги очилди. Францияда кўплаб таниқли сиёсатчилар ва жамоат арбоблари қаршилик кучларини қўллаб қувватлайди.
Олланд 2012-2017 йилларда Франция президенти бўлган.
Аввалроқ "Толибон" делегацияси Туркманистонга жўнаб кетгани ҳақида хабар берилганди.
Жаҳонгир Қўзиев
