Нукусда фуқаро уйида қизил китобга киритилган 3 бош жайрон сақланаётгани аниқланди

 

Нукус шаҳрида фуқаро ўз уйида Ўзбекистон Республикаси Қизил китобига киритилган сут эмизувчилар тоифасига кирувчи 3 бош жайронни сақлаётгани  аниқланди. Бу ҳақда Қорақалпоғистон Республикаси Экология ва атроф муҳитни муҳофаза қилиш қўмитасига маълум қилди.

 

Ўзбекистон Республикаси Қизил китобига киритилган сут эмизувчилар тоифасига кирувчи 3 бош жайронни парвариш қилаётган фуқарога Ўзбекистон Республикасининг «Ҳайвонот дунёсини муҳофаза қилиш ва ундан фойдаланиш тўғрисида»ги қонунидаги 38-моддада кўрсатилган тартиб тушунтирилди. Яъни ёввойи ҳайвонларни бошқа жойларга кўчириш, иқлимга мослаштириш ва чатиштириш тадбирларини ўтказишга давлат экологик экспертизасининг ҳамда Ўзбекистон Республикаси Фанлар академиясининг хулосалари асосида илмий ва хўжалик мақсадларида йўл қўйилиши ҳамда ёввойи ҳайвонларни ўзбошимчалик билан уй шароитида боқиш тақиқлангани маълум қилинди.

 

3 бош жайрон Давлат экология қўмитасининг Қуйи Амударё давлат Биорезерватининг “Назархан“ ОФЙда жойлашган вольерда вақтинча сақлаш учун олиб кетилди.

 

Аввалроқ Қорақалпоғистонда "Қизил китоб"га киритилган жайрон ва қуёнларни овлаган браконьерлар Экология қўмитасининг инспекторларидан қочиб кетгани ҳамда овчилар томонидан "Қизил китоб"га киритилган жайрон отиб ўлдирилган ҳақида хабар берилганди. 

 

Муножат Валиева