"Қизил китоб"га киритилган жайрон ва қуёнларни овлаган броканерлар қочиб кетди- Энди "ўлжалар" кимга қолади?
Броканерлар томонидан умумий 14 дона жайрон ва 5 дона ёввойи қуён овланган.
Қорақалпоғистон Республикаси Экология қўмитасининг инспекторлари томонидан ўтказилган навбатдаги рейд жараёнида Тахтакўпир тумани "Қоныраткол" ОФЙ чўл зонасининг “Тасберген” кран атрофида “Уаз 469” русумли автомашина ёнида турган бир неча номаълум шахслар инспекторларда шубҳа уйғотган. Инспекторлар номаълум шахслар томонига яқинлашаётганида улар зудлик билан автомашинага ўтириб воқеа жойидан яширинган. Инспекторлар улар ортидан 5 км масофагача таъқиб қилиб борган. Бироқ номаълум шахслар давлат инспекторларидан қочиб кетишга улгурган.
Тахтакўпир тумани чўл зонасининг “Тасберген” кран атрофида инспекторлар томонидан номаълум шахслар турган жой кўздан кечирилганда воқеа жойидан номаълум шахсларга тегишли отилган патрон гилзаси, идиш-товоқ, хўжалик буюмлари бўлган пичоқ, болта, ёқилғи, қийим-бошлар ҳамда “Қизил китоб"га киритилган 14 дона жайронлар, 5 дона ёввойи қуёнлар ташлаб кетилганлиги аниқланган.
Юқоридаги ҳолат бўйича Қорақалпоғистон Республикаси Экология қўмитаси томонидан Орол табиатни муҳофаза қилиш прокуратурасига хабар қилиниб, тегишли тартибда далолатнома тузилган.
Ҳозирда терговга қадар текшириш ҳаракатлари олиб борилмоқда.
Аввалроқ, Маҳаллий овчилар "Қизил китоб"га киритилган жайронни отиб ўлдиргани ҳамда ушбу жайрон овловчилар устидан суд ҳукми ўқилгани ҳақида хабар берилганди.
Муножат Валиева
