АҚШ ва Россия ўртасидаги зиддиятдан "Боэинг" азият чекиши мумкин

 

Икки давлат ўртасидаги Украина бўйича можаро Американинг аэрокосмик гиганти "Боэинг" таъминот занжирига таъсир қилади, деб ёзади Reuters.

 

Геосиёсий кескинликлар бизнес учун "ноқулай иқлим" яратмоқда, компаниянинг таъкидлашича, "Боэинг" Россия титан етказиб беришига қарам.

 

Корпорация VSMPO-Avisma металлургия компанияси билан ҳамкорлик қилади. Самолёт ишлаб чиқарувчиси АҚШнинг ҳар қандай санкцияларини, шунингдек, Россиянинг жавобини кузатиб боришини ва баҳолашини айтди. "Боэинг" раҳбариятининг таъкидлашича, санкцияларнинг бир қисми компаниянинг таъминот тармоғига, шунингдек, унинг бизнес ҳамкорлари ёки мижозлари фаолиятига салбий таъсир кўрсатиши мумкин.

 

Аэрокосмик гигант шундоқ ҳам қийин кунларни бошдан кечирмоқда, чунки унинг таъминот занжири пандемия чекловлари туфайли зарбага учраган. Корпорация келгуси чоракларда салбий операцион пул оқимларини кутаётгани ҳақида огоҳлантирди. Таъминот нормал даражага қайтгунча муаммолар давом этади.

 

Москва ва Вашингтон ўртасидаги зиддият нафақат "Боэинг"ни, балки унинг рақобатчиларини ҳам хавотирга солди. Кўпгина Ғарб аэрокосмик компаниялари титан захираларини кўпайтириш тараддудида ва эритиш заводлари Россия ва Ғарб ўртасидаги савдо урушига аралашиб қолган тақдирда таъминот занжирларини мустаҳкамлашга ҳаракат қилишмоқда.

 

Аввалроқ АҚШ Россиядан хавфсизлик масаласида ёзма жавоб олгани хабар қилинганди.