Қашқадарёда “Майданак” туристик зонаси ташкил этилади
Лойиҳада 3 юлдузли меҳмонхона ва соғломлаштириш мажмуалари қуриш ҳам режалаштирилган.
Вилоятнинг Қамаши туманида “Майданак” туристик-рекреацион зонаси ташкил этилади. Бу ҳақда Ўзбекистон Республикаси туризм ва спорт вазирлиги хабар берди.
Маълум қилинишича, ҳозирда Қарши шаҳридан 176 км узоқликда жойлашган XIV аср зиёратгоҳи ва масжиди бўлган “Лангар ота” ҳамда “Майданак” обсерваторияси ҳудудигача бўлган йўл, электр таъминоти, сув ва оқова сув инфратузилмаси ўрганилиб, тегишли лойиҳа ишлаб чиқилмоқда.
Мутахассислар Майданак тоғларининг 7900 гектар арчазор ҳудудларида ўтов, "camping", "glamping", эко-уйлар, енгил конструкцияли контейнерлар жойлаштиришни муҳокама қилишди.
Бундан ташқари, Кўкбулоқ, Ўртадара, Чуқурқишлоқ, Каттаўра, Боғобод қишлоқларида 100 дан ортиқ меҳмон уйи барпо этиш, кўрсатиладиган хизматларни диверсификациялаш орқали ҳудудда "Mountain treck” “Mountain bike” ва экстремал туризм хизматлари ривожлантириш, шу билан бирга, осма дор йўли, қуриш режалаштирилган.
